यावल न्युज
यावल तालुक्यातील आडगाव ते चिंचोली मार्गावर मंगळवारी दुपारी झालेल्या भीषण अपघातात सुभाष बाबुराव पाटील (वय ७०) यांचा जागीच मृत्यू झाला असून, त्यांचा १६ वर्षीय नातू कल्पेश उत्तम पाटील गंभीर जखमी झाला आहे. चिंचोली येथे इयत्ता दहावीच्या निकालाची मार्कशीट घेण्यासाठी ते दुचाकीने जात असताना आडगाव फाट्याजवळ पिकअप वाहनाने त्यांच्या दुचाकीला धडक दिली.
अपघात इतका भीषण होता की सुभाष पाटील यांचा जागीच मृत्यू झाला, तर कल्पेश पाटील यास तातडीने जळगावच्या जिल्हा शासकीय वैद्यकीय महाविद्यालयात उपचारासाठी दाखल करण्यात आले आहे. डॉक्टरांच्या माहितीनुसार त्याची प्रकृती अत्यंत गंभीर आहे.
अपघाताची माहिती मिळताच परिसरातील नागरिक घटनास्थळी धावले. यावल पोलीस ठाण्याचे पोलीस उपनिरीक्षक मक्सुद शेख, हवालदार संदीप सूर्यवंशी यांनी घटनास्थळी भेट देऊन पंचनामा केला. पोलिसांनी मयताचा मृतदेह यावल ग्रामीण रुग्णालयात हलवला असून, जखमीवर उपचार सुरू आहेत.
या प्रकरणी वासुदेव बाबुराव पाटील यांच्या तक्रारीवरून पिकअप वाहन (क्र. एम. एच. ०४ के. एफ. ८४४०) चालका विरुद्ध यावल पोलीस ठाण्यात गुन्हा दाखल करण्यात आला आहे. या अपघाताचा तपास पोलीस निरीक्षक प्रदीप ठाकूर यांच्या मार्गदर्शनाखाली सुरू आहे.