यावल न्युज
यावल, 21 मे – यावल तालुक्यातील बोराळे मालोद येथील ग्रामसेवक आणि यावल पंचायत समितीमध्ये ग्राम सेवक अधिकारी म्हणून कार्यरत असलेले राजु अनवर तडवी यांचे दिनांक 20 मे रोजी सायंकाळी अल्प आजाराने दुःखद निधन झाले. त्यांच्या निधनामुळे संपूर्ण परिसरात शोककळा पसरली आहे.
राजु तडवी हे गेल्या दशकांपासून ग्राम सेवक अधिकारी म्हणून जबाबदारीने कार्य करीत होते. त्यांच्या मनमिळावू स्वभावामुळे ते अधिकारी, कर्मचारी, राजकीय पुढारी, पत्रकार तसेच सर्वसामान्य ग्रामस्थांमध्ये विशेष परिचीत होते. त्यांनी प्रशासनातील सेवा काळात प्रत्येक काम प्रामाणिकपणे आणि कर्तव्यनिष्ठतेने पार पाडले.
त्यांच्या अचानक निधनाने त्यांच्या कुटुंबियांवर दुःखाचा डोंगर कोसळला असून, एक निष्ठावान व कार्यतत्पर अधिकारी गमावल्याची खंत त्यांचे सहकारी व्यक्त करत आहेत. यावल पंचायत समिती मधील अधिकारी व कर्मचाऱ्यांनी शोक व्यक्त करून श्रद्धांजली अर्पण केली. आज दिनांक 21 रोजी सकाळी नऊ वाजता त्यांच्यावर सावदा येथील कब्रस्थान मध्ये दफनविधी करण्यात आली त्यांच्या पश्चात आई पत्नी व दोन मुले असा परिवार आहे.