यावल न्युज :
यावल वनविभागाच्या सतर्कतेमुळे सातपुडा पर्वतरांगांतील वैजापूर वनक्षेत्रात शिकारीसाठी आलेल्या परप्रांतीयांचा प्रयत्न फसला आहे. मिळालेल्या गुप्त माहितीवरून रेंज पथकाने कक्ष क्रमांक २२६, २२५, २२३ आणि २३२ मध्ये गस्त घालत असताना कक्ष २३२ मध्ये गावठी बंदुकीचा आवाज ऐकू आला.
वनपथकाने आवाजाच्या दिशेने धाव घेतली असता काही अज्ञात इसम गावठी बंदुकांसह दिसून आले. पथकाने पाठलाग केला असता, आरोपींनी आपली दोन मोटारसायकली सोडून दऱ्या-खोऱ्यांचा फायदा घेत जंगलात पळ काढला. घटनास्थळी कोणतीही वन्यजीव हानी आढळून आली नाही. जप्त केलेल्या दोन मोटारसायकली शासकीय वाहनाने चोपडा शासकीय आगारात जमा करण्यात आल्या आहेत.
या प्रकरणी भारतीय वन अधिनियम १९२७ चे कलम २६(१)(ड), (आय), महाराष्ट्र वन नियमावली ९ आणि वन्यजीव संरक्षण अधिनियम १९७२ चे कलम ९ व ५२ अंतर्गत गुन्हा दाखल करण्यात आला आहे. म. वनपाल वैजापूर यांनी गुन्हा क्रमांक W-2/22/5/2025 नोंदवला आहे.
ही कारवाई संपूर्ण रात्री चालू होती. पथकात आय. एस. तडवी (वनपाल वैजापूर), संदीप भोई, चूनिलाल कोळी, बाजीराव बारेला, भारसिंग बारेला, संदीप ठाकरे, निखिल माळी, हर्षल पावरा, गणेश बारेला, विजय शिरसाठ यांनी सहभाग नोंदवला.
ही कार्यवाही नीनू सोमराज (वनसंरक्षक, धुळे), जमीर शेख (उपवनसंरक्षक, यावल), प्रथमेश हाडपे (सहाय्यक वनसंरक्षक, चोपडा), समाधान पाटील (सहाय्यक वनसंरक्षक, यावल), विकेश ठाकरे (वनपरिक्षेत्र अधिकारी, वैजापर) यांच्या मार्गदर्शनाखाली पार पडली.
जनतेस आवाहन:
कोणतीही वनविरोधी किंवा बेकायदेशीर कृती — जसे की अवैध वृक्षतोड, लाकूड वाहतूक, अतिक्रमण, शिकार किंवा वन्यजीवांची तस्करी — निदर्शनास आल्यास महाराष्ट्र वन विभागाच्या टोल फ्री क्रमांक १९२६ वर त्वरित संपर्क साधावा, असे आवाहन वनपरिक्षेत्र अधिकारी वैजापूर यांनी केले आहे.