यावल प्रतिनिधी:
यावल शहरातील बाबूजीपुरा भागातील सहा वर्षीय बालक बेपत्ता झाल्याची घटनेने दुर्दैवी वळण घेतली आहे. शुक्रवारी (दि. 5 सप्टेंबर) सायंकाळपासून बेपत्ता झालेला मो हन्नान खान मजीद खान (वय 6, रा. बाबूजीपुरा) हा बालक शनिवारी सकाळी शेजाऱ्याच्या घरातील कोठीत जळालेल्या अवस्थेत मृतावस्थेत सापडला. या घटनेने शहरात प्रचंड खळबळ उडाली आहे.
मृत बालक शुक्रवारी संध्याकाळी सहा वाजल्यापासून बेपत्ता होता. कुटुंबियांसह नातेवाईकांनी सर्वत्र शोध घेतला, मात्र तो मिळाला नाही. शनिवारी सकाळी साडेअकरा वाजेच्या सुमारास शेजारील बिस्मिल्ला खलिफा दस्तगीर खलिफा यांच्या दुमजली घराच्या वरच्या मजल्यावरील कोठीत त्याचा मृतदेह मिळून आला.
घटनेची माहिती समजताच परिसरातील नागरिक संतप्त झाले व मोठ्या संख्येने घटनास्थळी जमाव जमा झाला. संशयित मारेकऱ्याच्या दुकानावर दगडफेक करण्यात आली. यामुळे वातावरण तणावपूर्ण झाले असून दंगा नियंत्रण पथकाने घटनास्थळी दाखल होऊन परिस्थिती नियंत्रणात आणली आहे.
दरम्यान, डीवायएसपी अनिल बडगुजर.हाजी शब्बीर खान, पोलीस निरीक्षक रंगनाथ धारबळे, सहाय्यक पोलीस निरीक्षक शरद कोळी, अजय वाढवे, उपनिरीक्षक अनिल महाजन, आयाज खान तसेच मुस्लिम समाजातील मान्यवरांनी जमाव शांत करण्याचा प्रयत्न केला.
फॉरेन्सिक पथक घटनास्थळी दाखल झाले असून पोलिसांनी परिसरात मोठा बंदोबस्त तैनात केला आहे. या हृदयद्रावक घटनेमुळे यावल शहरासह परिसरात शोककळा पसरली आहे.